Чыноўнікі некалькі месяцаў вырашалі, якія аўтамабілі «павышанай камфортнасці» трапяць пад транспартны збор, які давядзецца плаціць у дзесяціразовым памеры. Гэта прадугледжвалася зменамі ў Падатковы кодэкс, дакумент у канцы снежня падпісаў Аляксандр Лукашэнка. 18 сакавіка Міністэрства падаткаў і збораў апублікавала спіс машын, за якія хочуць спаганяць павышаны падатак (спачатку — з арганізацый, а ў перспектыве — і з фізічных асоб).
Нагадаем, з гэтага года ў Беларусі ўвялі павышаны транспартны падатак на аўто павышанай камфортнасці, якія не старэйшыя за тры гады. Гэты збор будзе ў дзесяць разоў вышэйшы, чым стандартны. Пры гэтым урад мусіць вызначыць, якія канкрэтна аўто будуць падпадаць пад павышаны падатак.
18 сакавіка МПЗ паведаміла, што падрыхтаваны праект пастановы Саўміна са спісам такога транспарту. Дакумент знаходзіцца на ўзгадненні ў зацікаўленых дзяржорганаў, удакладняюць у ведамстве.
У праекце пастановы акрэслены пералік транспартных сродкаў павышанай камфортнасці:
| Марка транспартнага сродку | Мадэль (версія) транспартнага сродку незалежна ад тэхнічных характарыстык і камплектацыі |
|---|---|
| 1. Audi | A8*, Q8*, R8*, RS6*, RS7*, RSQ8*, S8*, SQ8* |
| 2. Aston Martin | Увесь мадэльны шэраг |
| 3. Aurus | Увесь мадэльны шэраг |
| 4. Bentley | Увесь мадэльны шэраг |
| 5. BMW | 7*, 8*, M5*, M6*, M7*, M8*, X6*, X7*, XM* |
| 6. Bugatti | Увесь мадэльны шэраг |
| 7. Cadillac | Escalade |
| 8. Ferrari | Увесь мадэльны шэраг |
| 9. Lamborghini | Увесь мадэльны шэраг |
| 10. Land Rover | Range Rover
Range Rover Sport |
| 11. Lexus | LC*, LS*, LX* |
| 12. Maserati | Увесь мадэльны шэраг |
| 13. McLaren | Увесь мадэльны шэраг |
| 14. Mercedes-Benz | AMG Е*, AMG S*, AMG SL*, AMG G*, AMG GT*, AMG GLE*, AMG GLS*, G*, GLE Coupe*, GLS*, S*, SL*, Maybach* |
| 15. Porsche | Увесь мадэльны шэраг |
| 16. Rolls-Royce | Увесь мадэльны шэраг |
| 17. Toyota | Land Cruiser 300
Sequoia |
У МПЗ удакладняюць, што заўвага «*» азначае, што павышаны падатак будуць спаганяць з мадэляў (версій, серый, класаў) транспарту, найменне якіх пачынаецца з названых знакаў.
У ведамстве ўдакладняюць, што арганізацыі павінныя выплачваць транспартны падатак за гэтыя аўто па стаўках, павялічаных у дзесяць разоў. Сёлета гэтае патрабаванне распаўсюджваецца на машыны, выпушчаныя ў 2022, 2023, 2024 гадах. Стаўкі транспартнага падатку залежаць ад дазволенай максімальнай масы, колькасці пасадачных месцаў або за адну адзінку аўто.
Арганізацыі павінныя ўнесці аванс у памеры ¼ гадавой стаўкі транспартнага падатку на гэтыя аўто паводле наступнага графіка:
- да 22 сакавіка, калі аўто было ў арганізацыі на 1 студзеня гэтага года;
- да 24 чэрвеня, калі машына была на 1 красавіка;
- да 23 верасня, калі аўто было на 1 ліпеня.
У ведамстве дадаюць, што падчас вылічэння і выплаты авансавых плацяжоў ільготы па транспартным падатку не ўжываюцца.
Гэтае тлумачэнне МПЗ азначае, што пералік аўто, з якіх будуць браць павышаны транспартны падатак, фактычна ўжо зацверджаны. Далейшае яго зацверджанне, відаць, — тэхнічнае пытанне, бо ведамства ўжо прапісала канкрэтныя тэрміны, калі арганізацыям трэба выплаціць такі збор.
Для фізічных асоб, хутчэй за ўсё, увядуць гэты ж спіс камфартабельных аўто, за які трэба будзе пералічваць павышаны ў дзесяць разоў збор. Як тлумачаць у МПЗ, насельніцтву плаціць транспартны падатак за 2024 год трэба будзе ў 2025-м.
Нагадаем, пра транспартны падатак раней выказваўся Аляксандр Лукашэнка. На яго думку, плаціць за дарогі мусяць тыя, хто па іх перамяшчаецца: «Нейкую капейку заплацілі, і ўжо гвалт на ўсю рэспубліку: „Ах, многа“».
Чытайце таксама
