У Мінскім абласным судзе 4 кастрычніка пачнецца суд над былым вайскоўцам Паўлам Кучынскім, якога абвінавачваюць па сямі крымінальных артыкулах, уключаючы «тэракт» і «здраду дзяржаве». Раней у аб’яднанні былых сілавікоў BYPOL сцвярджалі, што яго пад катаваннямі прымусілі ўдзельнічаць у правакацыі супраць іх, паведамляе праваабарончы цэнтр «Вясна».
Паўлу Кучынскаму выставілі абвінавачанні па сямі артыкулах Крымінальнага кодэкса:
- ч. 1 арт. 356 (Здрада дзяржаве);
- ч. 2 арт. 295−3 (Незаконныя дзеянні ў дачыненні да прадметаў, паражальнае дзеянне якіх заснаванае на выкарыстанні гаручых рэчываў);
- ч. 2 арт. 290−5 (Арганізацыя дзейнасці тэрарыстычнай арганізацыі і ўдзел у дзейнасці такой арганізацыі);
- ч. 4 арт. 295 (Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў);
- ч. 2 арт. 290−4 (Стварэнне арганізацыі для ажыццяўлення тэрарыстычнай дзейнасці альбо ўдзел у ёй);
- ч. 3 арт. 289 (Тэрарыстычны акт);
- ч. 1 арт. 309 (Наўмыснае прывядзенне ў непрыдатнасць транспартнага сродку або шляхоў зносін).
Працэс пачнецца 4 кастрычніка ў Мінскім абласным судзе. Суддзёй прызначаны Аляксандр Рыбакоў, які ў 2021 годзе правёў першы суд па «справе Ціханоўскага».
Па абвінавачаннях у дзяржздрадзе і тэрарызме мужчыну пагражае смяротнае пакаранне.
31-гадовага мінчука затрымалі прыкладна ў пачатку верасня 2022 года. Тады арганізацыя BYPOL напісала, што Кучынскі затрыманы ў сувязі з імавернай датычнасцю да «справы інкасатараў», а пасля сілавікі выкарысталі яго ў сваіх мэтах.
«Спецслужбы пад катаваннямі прымусілі [яго] удзельнічаць у правакацыі, у рамках якой апошні выйшаў на сувязь з прадстаўнікамі BYPOL і прапанаваў здзейсніць акцыі прамога дзеяння. Усе перамовы і перапіска фіксавалася», — сцвярджалі ў арганізацыі.
Нагадаем, у верасні мінулага года з’явілася інфармацыя, што ў мінскае аддзяленне «Белгазпрамбанка» прыйшлі сілавікі і жорстка затрымалі больш за дзясятак супрацоўнікаў інкасатарскай службы — імаверна, за абразу Лукашэнкі. Усіх іх абвінавацілі ў непадпарадкаванні міліцыі і далі па 14 сутак, некаторымі зацікавіўся Следчы камітэт.
Аднаго з былых інкасатараў банка, спецназаўца Яна Папковіча, ў траўні асудзілі на чатыры гады калоніі па арт. 342 КК (Удзел у групавых дзеяннях, якія груба парушаюць грамадскі парадак) і па ч.1 арт. 13, ч. 1 арт. 361−3 КК (Падрыхтоўка да ўдзелу ва ўзброеным фарміраванні на тэрыторыі замежнай дзяржавы).
