Мінчук два гады прабыў у лекава-працоўным прафілакторыі (ЛПП), а калі вярнуўся да сябе дадому, выявіў, што ў пакоі разбітае акно, а камунальныя паслугі адключылі за даўгі. Ён здзівіўся, адкуль узялася пазычанасць, і пайшоў з гэтым пытаннем да ўладаў, піша агенцтва «Мінск-Навіны».
Мінчук жыве ў прыватызаваным пакоі двухпакаёвай кватэры, які належыць яму. Два апошнія гады прабыў у ЛПП, і ўвесь гэты час ягоны пакой быў замкнуты. Статус іншага не зусім зразумелы, хто жыў у ім — невядома. Газу ў кватэры не было і раней, цяпер няма і святла — адключылі. Сантэхніка не працуе, акно выбітае, рама зламаная.
Вярнуўшыся з ЛПП, мужчына зарэгістраваўся беспрацоўным, пры спрыянні службы занятасці знайшоў працу. Аднак ёсць яшчэ адна непрыемнасць: назапашаная пазычанасць па аплаце жыллёва-камунальных паслуг, пра якую мужчына даведаўся ад судовага выканаўцы.
Мінчук здзіўляецца: як магла ўтварыцца пазычанасць, калі камунальнымі паслугамі ён не карыстаўся — яго фізічная адсутнасць пацвярджаецца дакументальна. Лічыльнік у кватэры адзін, агульны на два пакоі, — цяжар жа доўгу ляжыць на ім адным. У разліковых лістках за працу, якая выконваецца ў ЛПП, ніякая пазычанасць не адзначалася і, адпаведна, не кампенсавалася. Лічба ж набегла вялікая: агульная сума доўгу на гэты момант — каля 4,3 тысячы рублёў.
Старшыня Мінгарсавета Арцём Цуран дапусціў, што пазычанасць магла сабрацца не толькі за час знаходжання ў ЛПП — не выключана, што яна цягнецца з ранейшага часу.
У выніку вырашылі, што акно адрамантуе ЖЭС, а пазычанасць па выплаце пені заканадаўства дазваляе пагашаць у растэрміноўку — з адпаведнай заявай можна звярнуцца ў адміністрацыю раёна. Туды ж, а канкрэтней — у службу «Адно акно», Арцём Цуран параіў мужчыну звярнуцца па матэрыяльную дапамогу.